انقذ مشاعرك م الغرق
او رص أحزانك طابور
كل اللي ساندك كان ورق
والبرفانات طلعت بخور
علي مين تلوم وازاي تصوم
والكل خان ملح السحور
عاشت العيون جوه الجفون
من غير ما تلمح طرف نور
كل الطيور اتبدلت كانت حمام
صبحت صقور
كل الجسور اتحولت بدل العبور
قلبت صخور
كل المشاعر مهلكة مستهلكة صابها الضمور
كل النفور باعد شعور الاهتمام ب ابسط أمور
كل الأراضي اتغيرت حلفت ما هتكون الا بور
حتي السحاب اتعكرت
حتى النجوم اتبعترت
كل المشاعر عبرت
إن الغرور ماضي الحضور
كل الاماني اتشردت
كل القرود اتنمردت
تحت الشجر عاملين نمور
كل القلوب اتحجرت عاشت سنين
طالبة التبرع بالسرور
حتي السرور علشان يزور
محتاج سنين خنقه مرور
كل النفوس اتطوحت
من غير ماتشرب م الخمور
كل الحروف لما بكت
مالقتش غير حضن السطور
كل الحبايب ودعوا
وسابو الحنين
كات هي بوسة علي الجبين
وفراقنا كان احساس مهين
حتي اللقاء بعد البقاء
هيكون لقاء جوه القبور
....
محمود القصبي
0 التعليقات:
إرسال تعليق