بتنكش ليه علي يأسك
وليه ف الهم حد طموح
يا مستني الطوفان ياخدك
لحد حدود سفينة نوح
يا ساقي الورد من خيرك
وشم الورد ناس غيرك
يا مستحرم تنام جارح
يامتعود
تبات مجروح
وحيد فكرك وأيامك
بتسأل نفسك البائسة
على شروط الحياة اليائسة
وأحلامك في أحلامك
ده حتي الحلم مش مسموح
ليه اللي امنت بوجوده
ولحنك صار علي عوده
بتزرع حب من قلبك
وتجني مرار في مردوده
وحظك زفت فين ماتروح
يا سايب قعدة المخاليق
وبتكلملي في مخدة
بتشكيلها وتحكيلها
وإيه صابك وإيه عدى
وريحة الغدر ليه بتفوح
ياصاحبي مخدتك خرسه
ما كانت يوم بتتكلم
أذاك تعبان بكام قرصة
وقرص الروح ده بيعلم
عشان روحك ب باب مفتوح
ف خدها والثواب ليا
دراستك في الحياه ساعة
تعادل 1000 كلية
ف اوعي تهون عليك روحك
ياصافي القلب والنيَّة
ولو راحت مع عباده
ما عند الله في شئ بيروح
و فتش تاني عالفرحة
ل روحك وأعبر القارات
ولو تحسب تاريخ عمرك
يادوب مافرحت غير مرات
ويوم ماكتبت ف سيناريو
ما كنت ملاحق الحوارت
على لحن الفراق دايما
بترقص رقصة المدبوح
ف غيَّر من ديكور فيلمك
وحسّ انك بني ادم
وفك الجبس من حلمك
وفَوَّق قلبك المبطوح
.......
محمود القصبي
0 التعليقات:
إرسال تعليق