صوتك بقى شجره غريبه
على ناصية شارع تاه عنوانه
غطاها
دخان القطورات
مابقاش الطير الراجع لبلاده
بعد مواسم غربه
يحط عليها
ويجْدِل من أغانيه
حبل الود
الموصول
من قلب مسافر
ف سفينه فْ عرض البحر
أو راكب قطر
لمحطه بعيده
أو مينا
لها نفس ملامح روحه
مالك ؟
اٍيه اللى حصل لك ؟!
بَطَّلْت خلاص توصف أشياء
انت وبس
اللى عيون قلبك
شايفاها
بطلت تترجم لغة الطير
والناس اللى بيمشوا على المَيّه
لأغانى أطفال
وقصص
عن حلم جنين
بيحارب
وبيرفض
اٍن الكوابيس
تاخد حبله السُّرّى
تعمل منه
خيط صنّارة صيد
أو خيط تحريك للدُّمْيَه
أو تنسج بيه اكفان
اٍيه اللى جرى لك ؟
انت خلاص
كل ما تيجى تبص لنفسك
بتشوف اٍنسان آلى
اٍتمكن من غزوك
سيطر
على كل خليه فْ قلبك
والا الغُدَّه
اللى بتفرز
شعر وحب وحنيه وعنف
وورد شوك
سرقوها خلاص منك
تجار الأعضاء البشريه
وبعد ما فَشَلِتْ
كل محاولات زراعتها ف جتة بنى آدم
أو طير
حَطُّوها فْ متحف متخصص
للمهتمين
بدراسة حفريات الكائنات النادره
والمنقرضه
......
محمد علي عزب
0 التعليقات:
إرسال تعليق