الجان حررنى وخرجنى
من قلب فانوس
عمال يشرح لى وعلمنى
للخبث دروس
أنا كنت قاعد ومبطرخ
ولا ليا كلام ولا فيه مطرح
شغال بتفرج ع الدنيا
وبقزقز سوس
خدنى وخرجنى من القمقم
وقال ده شغلك ياسى ضمضم
تسرح وتشكك فى الدين
وتضلل ف البنى ادمين
وتخلى حياتهم فى الطين
بالحكمه ووسواس مدروس
قلت له انا هاقعد واريح
واشرب لى سيجارة
وافكر هعمل ايه بكرة وبكل شطارة
والله دى فكرة
منا العب بعيال الحارة
يتعلم يشرب ويدخن
ويجيب ف فلوس
الواد سهانى
وراح صلَّى الفرض فى جامع
والتانى ءأذن فى ودانه
عامل مش سامع
والتالت غرقان فى دروسه
وهيصبح لامع
حقيقى انا منهم بصراحه
بقيت ميئوس
فكرت ادخل ياحبايبى
وسط النسوان
اكيد هلاقى فيه ثغرة
ويكون لي مكان
راح ازرع فرقه وفركيشه
كما قال الجان
وفضلت اوسوس واخبط
على كل ودان
مالقيت ولا طاعه
ولاحتى ألمح اذعان
والواحدة منهم بتهينى
كده بالمحسوس
روح ابعد عنا ياغريبنا
يابو قرن جاموس
بعدين وياكم يا جماعه
تعبت أعصابى
دا انتم كنتم من فترة
أعز صحابى
ووصلت معاكم من مدة
راح تبقوا مجوس
بقى كده يتغير كده حالكم
بقى بالمعكوس
وكمان بتصلوا وبتصوموا
وترشوا فلوس
يا جنان العالم حلونى
هيفوروا دمى
دى كل اكله بتتاكل
والكل يسمى
وافضل جوعان انا طول يومى
طلعوا عين أمى
دى الاكله كانت عيش ناشف
ومافيهش غموس
والكل حامد ليه وشاكر
ولكفه يبوس
انا حاسس انى من ادم
هرجع ملبوس؟!
فكرت ببنت بتتدلع
بماشيه عجيبه
ملابسها حلوة ومفروشه
زى التكعيبه
انا قلت اوسوس في ودانها
تصبح لى حبيبه
اتاريها ادارت و بسرعه
لبست تحجيبه
وبتدعى عليا اكون شارد
وكمان مهووس
ادى راجل شايب بيقرب
ودى فرصه عال
العب فى دماغه ويخرب
ويسفّ المال
ويضيَّع حق مواريثه
ويموت فى دلال
اتاريه كان زاهد بيصلى
ولا ليه اطماع
ولاحتى ع الدنيا يغنى
وللحق شجاع
والاقيه بيصرف يتصدق
ولربه انصاع
ورجعت مقمر فى قفايا
عبيط موكوس
بسرعه ياجدى دخلنى
ف قلب فانوس
اعزلنى كمان انا بصراحه
شيطان منحوس
........
خالد أمين
0 التعليقات:
إرسال تعليق