حمامة لون النهار
مصلوبه .. على برج الموت
وصرخة ألم مخنوقه
راح منها الصوت
ودموع ف عيون حيرانه
مش عارفه تفوت
وعيون ف دموع غرقانه
مراكبها سكوت
وتابوت .... شايلك يا ضنايا
وأنا قلبي ويَّاك محطوط
خطفوك من عمري
وفاتولي الحزن المكبوت
يا ضمير العالم
فين إبني .. ؟
فين شجر التوت ؟
فين ضحكة شمسي فوق بيتي
وكتاب مخطوط ؟
مين خطف الغنوه من طيري
والورده من قلب العود ؟
منحوته ع الصدر أوجاعي
والجرح بيتمدّ خطوط
ملعونه يا إيدين بتطبطب
وبتغزل م الدم خيوط
وبتسرق من داري الضلَّه
وبتخطف من بطني القوت
أنا خايف من بكره يجيلي
يناديلي من بطن الحوت
.....
سليمان خطاب
0 التعليقات:
إرسال تعليق