الشمس .. شاخت ع الشجر
وجوَّه براح الروح
ماعادش فيها دفا
ولا حلاوة روح
جفِّت عروق المطر
بات اللمون مجروح
اصدح يا طير بالغُنا
مدّ ف خطاوي الشوف
ما سمعت غير البُكا
مخنوق ف قلب الخوف
و انا المحدوف على بكره
أبو الجناح مكسور
ده النخل بايت يشتكي
و التمر فيه مقهور
يا عنبة يا مضفَّرة
ضي القمر عناقيد
مش لاقِي ليه ضلتك
في دفتر المواليد ؟
لون السما غامق
منقوش على جناحي
م العتمة خايفة النجوم
جرح القلوب صاحي
يا قمرة يا مفتّحه
جوَّه عيون مناديل
مين اللي غمّى عنيكي؟
وفتّح عيون الليل
نفسي أشوف ضحكتي
فوق الشجر عصافير
واسمع غناوي البحر
تطرح بشاير خير
وأشوف البت...
أم الحلق فضة
تمد إيدها للسما
تتوضا
تنط ف عين الشمس
100 نطه
وبين الملح والشطه
أنا عايش
وكل منايا ...
ف عز البرد أتغطى
....
0 التعليقات:
إرسال تعليق