العلقم مر
وساعات الحب بيبقى أمرّ
وساعات الحلو مابيكونشي
غير وسط الجمر
حطيت الإيد ع القلب ونمت
سلمت الأمر لصاحب الأمر
يمكن ارتاح
والذكري على الأحباب ح تمر
حبيت وندمت..وبعدت ندمت
مخنوقة مابيني وبين نفسي
صايمة ومحتاجة لحبَّة تمر
ح يعدِّي القطر
ويحوِّل اسمي يادوب ذكري
مانا عايشة..
وحاسة مانيش عايشة
وتعبت من الصبر وبكره
بكره اللي ماجاش ولا زار العمر
يمكن ف الموتة أعيش أكتر
الموت أوقات بيكون سكر
يمكن أقدر
والاقي ف موتي ..حاجات بتسر
ماانا عايشة ..و كل دقيقة باموت
متلصم جسمي بحبِّة جرح..
مش طالع صوت
باتفرج على عمري ف شاشة
عمال بيفوت
الفرح قصادي يادوب خطوة
وانا حزني خيوط ..عمال بيكر
أطلع من حزن ..فاقابل جرح
اطلع م الجرح ..الاقي الدمع
من همّ لهمّ
وبالملم همِّي وبيعاند.. مارضيش يتلم
والحل اموت .. وبكل ارادتي وتفكيري
مانا عايشة
وحاسه ما نيش عايشة
والعايش فيَّا واحد غيري
بيأنب فيا وبيعاتب
دا ضميرهم ده ..ولا ضميري
احترت بجد ف موضوعه
واقف ويايا على الواحدة
بيعدّ الحركة مع الضحكة
وبيحسب بصيت كام نظرة
ومشيت كام خطوة بدون طوعه
كان نفسي أعيش ..
لكن موتي ... هو اللي أصرّ
ح ارتاح م الفكر اللي شغلني
من توهه .... بتعوم وتعدي
وانا باغرق رغم ان انا ع البرّ
مش قادرة أحدد وافرق
بين خير أو شر
وباخاصم روحي اللي ف روحي
انا خلف خلافي
بقيت ضدي
اتنين ماشين لكن بالعكس
بسأل يا دموع امتي تروحي
مش ناقصة جروح
تغلى جروحي وماحدش حسّ
من يوم ماوعيت وجراح وجراح
بتكفيني لسنين قدام
وبتعزف وقت الجرح الزمرّ
لله الأمر
....
هبه حسن
0 التعليقات:
إرسال تعليق