اتنين اغراب اتقابلوا
بالصدفه البحته كدا
ف محطة قطر
ركابه ماهماش عارفين
رايحين على فين؟
**********
هو...
تذكرة السفر اللي معاه
عمره ما سابها
نازل من بطن الأم
وهوا ماسكها ف ايده
كل شويه يبص
من شباك القطر
على الأشياء اللي الناس
بيسموها جناين
ويقول :
انتي صحيح أشجار
يعني عيدان فل وياسمين
وحاجات من دي
والا انتي
شبكة صيد
وفخاخ
اتنصبت لنا في السكه
**********
هي
قاعده على الكرسي اللي قصاده
كل شويه
تتبسم وتقول له :
ما تكشرش
الورد هييجي أوانه
بتقول له كدا
وتطلع من شنطتها مرايه
تتأمل فيها
فتشوف جواها
طفله بتحبي ف صحرا
شفايفها بتنزف شوك
صوابعها
بتحاول تمسك شئ
شئ أخضر
عمال يغطس حبه حبه
ف قلب الرمل المتحرك
..........
محمد علي عزب
رائع شاعرنا المتألق محمد علي عزب
ردحذف