يا بلادى يا شايلة همِّى
يا حبيبتى وزىّ... أمِّى
محتاج حضنك تضمِّى
حضنك هو الهنا
ضمِّينى بشوق لحضنك
والله انا حتَّة ...منك
مش هابعد تانى...عنك
وهنرجع كلنا
بالحب إيدينا ..واحدة
والدنيا علينا ...شاهدة
نرعاكى يا أحلى .وردة
وننسيكى الضنا
فلاح ......يزرع ورودك
عالم ....يضمن وجودك
جيشك يحرس حدودك
ويدافع عننا
يا أصيلة وفيكى جارى
نيلى بفرحة ......نهارى
وبخيره بيملا..... دارى
ويطمن قلبنا
ويطمن قلبنا
ويطمن قلبنا
.....
محمد عبيد
عاش الشهيد
خليكوا جنبي إيد ف إيد
نهتف سوا ونقول نشيد
عاش البطل عاش الشهيد
واحنا عشانك كلنا
جايين ويشهد ربنا
حبِّك يا غالية في دمنا
واليوم دا يومك انتي بس
هنقول سوا وبأعلي حسّ
تعيش تعيش أم الشهيد
يا ام الشهيد اتبسمي
وعلى الحبايب سلمي
وبضحكِتك قومي ارسمي
فرحة ومحبة وشوق يزيد
رغم انه غايب عننا
حوالينا روحُه تضمنا
وتقولنا...
إن النهارده أحلى عيد
من قبل ما احنا نكرَّمِك
ربي في سماه بيطمِّنك
وان كان فراقه بيإلمك
كفاية ان ابنك شهيد
دمعة عيونك دي وسام
من بعدها خلص الكلام
ابنك شفيع يوم الزحام
ما هو شهيد
يا ام الشهيد اتبسمي
........
محمد عبيد
ولأنها مفردة
بتغني ف الأوردة
وعينيها فيهم هدي
مرهم يداوي الروح
مديت ايديا ألمسك
جمرك ف توبي مِسك
وأنا لما بتنفسك
يوحي اليا.... وأبوح
جرحي يا جرح الوله
من عشقي فاض واتملا
جوايا صحرا وخلا
تفرد وجع وجروح
يا آية يا معجزة
حبيت وشرطك إذا
بُعدك خصومة وجزا
بعدك بتوووه وأنوح
في كف ايدي اتقري
ريقك ف دمى جري
انهي بقى وأؤمري
ما انتي الكتاب واللوح
......
سليمان الزهيري
ماحناش لبعض
ولا اللي بينا بكلمتين راح يُكتمل
أنا شيلت يامَا فُوق حُدود المحُتمل
والمحُتمل... بل والأكيد ،
إنك بعيد رغم المسَافه قُريبه
وأنا طيبه ،
وأشبه في طبعي لطِفل لما يحب شئ
بيخاف عليه ويقدَّره ،
بس الحياه علشان بتمشي عكسِنا
فبتخِطف اللي بنُملكه بالعِند فينا وتكِسره
رغم الفُراق
لسَّاني برضه محتاجاك
قلبي اللي سابني وراح معاك
إزاي تبيعه وتخِسره؟
أنا بعشَقك .. إفهم بقي ،
يمكن أكون موهومه....
بس مصدقه
إن اللي بينا شئ حقيقي...
ومش خيال
كان إيه هايجرا...
لو تسيبني بكِدبِتي مِتزوقه ؟
فيبان فـ وشي بإن قلبي كان سعيد
بس الطبيعي إن المُحال...
الحال يدوم
ومن المُحال إن اللي مات
روحه هاترجع من جديد
راح يجي يوم قلبي الشهيد يلقاك كفن
ولَّا أقولك .. لأ بلاش
من بداية خلق آدم والكلام أصله ببلاش
هومين الحب وعده... ثم قاله إنه جيّ؟
كام حزين إستنى يوفي؟
كام قتيل في الشكل حيّ!
واللي صدق مره نفسه
وشاف ضلام الدنيا ضيّ
إكتشف إن الحقيقه
الآوان كان وقته فات
لم أحلامه وآلامه
لم كُل الذكريات
وإنت قَصرت المسَافه من سُكات
قولت ماشي
عادي إمشي وخد معاك كُل الحاجات
صورتك المتسرسبه جوه العنين
خُد معاك كُل الحنين
وإوعى تنسى شوقي ليك ،
وإفتكر تاخد معاك ..
رعشة إيديا المشتاقين
ماتسيبش حاجه..
لاجل ماتفكرني بيك
....
ولاء عدنان
