مش كل مرة هتدفعي ف دمك تمن
وتداوي كسرة نظرتك جوه النفوس
حزنك...
وراقد ف البدن
وف سكتك لابدة الأماني
ما كاتش تفهم معني بيزنس
أو فلوس
الحوجة طعنت سترها
واللي بيكشف ضهرها
فارش بيوت الناس ألم
كان العلم حاضن جماجم أهلها
راسه اللي سقطت م الخجل
كسرت رقاب الناس وجل
يمحي السخف ريحة الأمان
من فوق وشوش اللي اختشوا
والمستخبي ف عرضها
يدبح قدرها لو ابتسم
ماكانتش اخر دمعة يطلقها الكابوس
جوه المعسكر
والطيور الجارحة تبرك ع القلوب
الحلكة طمست أي نور
وقفوا الاهالي ف الطابور
مترصصين جوه الكالوس
تنجي الحناجر م الخرس
تسقط ف أحضان الحرس
ينضح مرار الصبر من قلب اللي حبك
واللي شارب دم قلبك
يتم الحلم اللي باقي ف سكتك
مش كل مره هتوعدينا بجنتك
تحبل قلوب ناسك حرام
وتوطي راسك ف المحن
تتلبد الاحلام الام
لحظة ما غضيتي البصر
عريتي كتفك م الشقا
كان ف المزاد بين التيوس
معروض حياكي اللي اتسرق
صرخ اللسان اللي اتشنق
ينزف شقا دمه الرخيص
وف منطق الحشد الخبيث
بين كل تجار الغرق
بالعفة يتباهي الخسيس
والنخوة مبدأ ع الورق
....
محمد الطنطاوي
0 التعليقات:
إرسال تعليق