وشق الحزن على خدي
بحور مليانة بالأحزان
عيون تاهت في دنيتها
ودبلت حتى نظرتها
وروح الفرحة هجرتها
في دنيا فيها راح عمري
سراب عدَّى كأنه ماكان
****
وكان دا ليه من الأول
يزورنا الحــــزن ويطوِّل
وكاس المـــــر يسقينا ؟
تضيع منَّـــــــا أمانينا
محدش ليه حاسس بينا
دِبِل ورد الصِّبـــــا فينا
وراح من وشنا الألوان
****
وفجأة يغيب أعز ما ليك
ولا يفكر في لحظة فيك
يشوف الحزن مالي عنيك
ولا عايز في يوم يرجع
يلم الشمـــــــل من تاني
ويقفل لك بيبان حرمـــان
****
قلوب بتكويها اللَّوعة
وعيون بتنزف الدمعة
وسط ضلام بدون شمعة
وصرخة من الألم طالعة
وناس تايهة ومش سامعة
وصوت حتى خيال كداب
أمل مبدور في كل مكان
****
قلوبنا تفضل موجوعة
مابين ماضي وبين حاضر
جذور الفرحة مقلوعـــة
وشرايين حب مقطوعة
أهات جوانا مسموعة
وعيون بتبكي طول الليل
من حرقة نار الأشجـــان
*****
وبرغم قسوة الدنيا
عايشين بالأمل فيها
في ساعة حظ متشالة
تبدل حزننــــا أفــــراح
وأخرة صبــــــرنا نرتاح
ونلقى ف كفنا المفتاح
نغيَّر بيه في حيــــــــــــاتنا
ويبعد عننا الأحـــــــــزان
......
محمد جوده
0 التعليقات:
إرسال تعليق