حالو ياحالو
فوانيس السما بيصلوا
والبدر بيتوضا هلاله
والصوم بينغم مواله
مع رحمه وتوبه يهلوا
حالو ياحالو
والكون بيزوق سمواته
والرب بيرسل رحماته
ف ليالى الإحسان والنور
وبنطلب من رب غفور
تتوج شهرنا بركاته
وليالى تلف بفوانيسها
عروسه والشهر عريسها
وعيال سهرانه تونسها
للصبح يدوروا يغنوا
حالوا ياحالو
الفجر مطرطأ ف ودانه
مستنى يأذن ف اذانه
والشيخ بيرتل قرآنه
مع دعوة رضا يتلموا
حالو ياحالو
حالو معانا بهليله
نفرح ونلم العيله
مع ضربه مدفع بيدور
بيلف على كل الدور
وتفرد امى الطبليه
والبركه ف ايدها محنيه
وابويا يقرا القران
ويدعى يارب الغفران
ارزقنا جنه رضوان
والدنيا بتفرح ويانا
والخير والرحمه جوانا
وجيران الحته يهنوا
حالو ياحالو
حالو وفك التحويشه
زود ف كرمك كام ريشه
وياك راح تحلى العيشه
وتعود من تانى ياحالو
...............
الشاعر/ خالد امين
0 التعليقات:
إرسال تعليق