بيقول لك :
اٍن البطريق من صنف الطير
مع اٍنه ما بيطيرش
وعمره ما زقزق على شجره
لو فكر يعمل عش
دايما يبنيه م التلج
ويقول لك :
على واحد زى حالاتى
كان له تاريخ ف الطيران
اٍن كلامه
عن رفرفة الجناحات
والرقص مع النور ف السموات
خيالات
وكلام شعرا
ده التصنيف المعمول بيه
ف محاكم تفتيش الأحلام
واقفين بمقص المونتاج
وعينيهم
على أى جناح بينبّت
"وهنا مقص وهنا مقص"
وعرايس
قدام الكاميرا بتترص
حسب النَّصّ
والتصنيف المعمول
ف محاكم تفتيش الأحلام
بيسموا التمثيل اللى احنا بنلعب فيه
دور الكومبارس
والأزياء وكراسى المنصب والرتبه
أبطال العرض
واقع وحقيقه
ويسموا اللحظه
اللى الواحد فيها ما بيصدق
اٍنه يحن لأصله
أحلام يقظه
وبرغم ده كله
بتلاقى مقص المونتاج
اتفاجئ بالصّباره
اللى بتطرح ورد فْ وقت خريف
تعلن
بطلان التصنيف السابق
وناس ماشيين على باب الله
قدام محكمة التفتيش
بيخبوا الأحلام تحت الجلد
ويبصوا لبعض
ويقولوا :
بكره هتُفرج
......
محمد علي عزب
0 التعليقات:
إرسال تعليق