أول حاجه بيعملها الصبح
بيكتب ويسجل
أسماء وملامح
كل اللى عينيه كانت شايفاه ف منام امبارح
أشجار
وبيوت
وطيور
وبعد ما يعمل ده
يبص لنفسه فِ مرايته
ويقول :
للوش اللى بيظهر قدامه
عارف
أنا لو ما عملتش كده ممكن
ييجوا فْ يوم
ويحطوا
بينى وبينك صحرا
ألغام وجبال ديناميت
وساعتها
لو فكرت اوصل لك
أو توصل لى
عارف طبعا
اٍيه اللى هيحصل
أنا لو ما عملتش كده ممكن
أفتح جرنال الصبح
الاقيك ناشر فيه تنويه
عن واحد مفقود
خد بالك .. وما تنساش
لو حصلت ونسيت
اٍنى اعمل كده فَّكَّرْنى
أكتب وارسم
أسماء وملامح
كل اللى أنا شوفته
ليلة امبارح
ف منامى
أصل ولاد الكلب البعدا
لِعْبُوا
بعيون الناس اللى زمان كانت
تمليك للأحلام الحقيقيه
دلوقنى بقت
بنسيونات وشقق مفروشه
كل شويه
تسكن فيها حاجات وتروح
وتيجى مكانها حاجات تانيه
.............
محمد علي عزب
0 التعليقات:
إرسال تعليق