قالولي اكتب ع الغرام وأفرح وأعايش
وما يعرفوش إن القلم بقا سِنه هايش
وان العَجَز طافح على جسمي وعاشش
والقلب مقبوض م الذنوب مخضوض وكاشش
الدق ع الراس إبتدى والعضم بايش
يا عم إضحك ع الألم بارك وناوش
خليك ورق حتة قماش
أو حتى عنقود من غوايش
قالولي أكتب ع السلام وسلام محبَّة
قُلت السلام جوة القلوب..فين الأحِبَّة؟!
الدنيا مليانة بمحارق وبمعارك
على بعض كَبَّة
وصِوان قِوالة ع الجراح محطوطله صبَّة
الحب هربان م البيوت وكأنه سبَّة
والقرح فارش ع العقول والغبَّة صعبة
خليك تابوت مليان بارود
وإغسل سلامك ببطاس وشَبَّة
قالولي أكتب ع الأمل وعلى السُكات
خليك معادل أو محايد ف اللي فات
واِمسح جراحك من حياتنا للممات
الدنيا وردي والطريق مليان ثبات
إنت اِللي غاوي هموم وزحمة ذكريات
خليك في حالك أو محلَّك
وإوعاك تزايد ع الآهات
قالولي خلاص خلص الكلام
وإلزم لبيتك وإلبس كِمام
ده الدنيا محصورة بزمام
والعُهدة ماسكينها اللئام
يعيش السلام يموت السلام
إقفل بيبانك يا أمل
..............
وائل ساليم عبد الله
0 التعليقات:
إرسال تعليق