واقف فى المطرة وبتصور
فرحان بالشجرة وبالمنظر
بتفرج واضحك واتمختر
علشان دفيان
الجاكت لابسه مدفينى
فوق راسى السقف بيحمينى
والموزة تشوفنى تهنينى
وتقولى ياچان
وانا بضحك ضحكة وملالية
يا سلام لو ايدك فى ايديا
انا وانتى ونتمشى شوية
ده الجو جنان
الشتا بالنسبة لى مغامرة
فرحان بالجو وبالمطرة
ويادوب خطيت اول خطوة
شوفت الغلبان
فى الصورة التانية من المنظر
الست دى قاعدة بتستنظر
أيدها على الخد بتتحسر
ودموعها هوان
صرخة ومكتومة ومش طالعة
والنفس عزيزة مفيش دمعة
تنده ع الدنيا ومش سامعة
جواها ايمان
طب مين مسئول عن دمعتها
طب ايه خلاها تسيب بيتها
وتقول للعالم.........شكوتها
غير الحرمان
والله حرام ....... تبقى انانى
والناس دى بتشقى وبتعانى
هتكلم مش هسكت تانى
ولا هبقا جبان
الرحمة ياناس د احنا غلابة
وكفاية عليكم يا ..... ديابة
وبلاش الهيصة ......الكدابة
اصحى يا انسان
...........
محمدعبيد
0 التعليقات:
إرسال تعليق