فى الأصل ما كانش عروسه خشب
مصنوعه باٍيد وخيال نجّار مقطوع الخِلْفْه
على هيئة طفل بيحلم بيه
وبقدرة قادر بعد كدا ...
يتحوّل طفل حقيقيى
"بونوكيو" .. كان فى الأصل
عُقْلَه
اتقطعت من شجرة ورد
طوحها الريح فى بلاد الله,
شبعت حرمان وعطش ومواسم غربه,
وبرغم دا كله,
كانت شايفه :
اٍنها م الكائنات الحيّه,
احتفظت بتاريخها.
لحد ما جالها اليوم اللى لقت فيه
همزة وصل وصل ما بين شرايينها وقلب الدنيا
فاخضرت من تانى,
دبت فيها الروح وبقت بنى آدم
"بونوكيو" .. حلم حقيقى
لكل غريب سرقوا ملامحه
وحطوا فْ وشُّه ملامح فرع قديم مقطوع من شجره
ماشى فى وسط الصحرا,
كل شويّه يفكّر روحه, بشكله زمان
ويقول : افتكرى كويس وما تنسيش
اٍن ملامحى زمان ...
كانت أشجار وخريطه وبُوصْلَه ...
يسترشِد بيها الطير الراجع م الغربه يدوََّر على بلده .....
وان كان العمر اتْجَرّف,
لسه البذره الحَيّه فْ قلبى,
خليكى معايا وبكره هنوصل
لمنابع نهر بعيد, صورته ما فارْقِتْش خيالى ..
هيضخ فْ شرايينى الخُضْره,
وارجع لملامحى الأصليه .. .
......
محمد علي عزب
0 التعليقات:
إرسال تعليق