لأ ...
دى مش ملكة نحل
بيجرى وراها العشاق
فِ سباق محموم
الفايز بيه هتجيب داغُه
ولا هىَّ شهاب
نوره خطف الأنظار
أول ما يقع ع الأرض
هيبقى حجر
لأ ..
دى نقطة
اختصرت بحر بحاله
بيشوف جواها الَبحَّّار المُتقاعِد
بميكروسكوب الروح
طير وسُفُن وأغانى وملح
وعروسة بحر فْ شكل غزاله
بتغنى وترقص ع الموج
بكل لغات الناس والطير والزرع
صوتها الدافى جزيره
طردوا البحَّار المتقاعد منها
بعد وشاية عَرّاف مُتصابى
خريف لابس جِتٍّّة بنى آدم
أوهمهم اٍن كتاب الرمل
ووشوشة الأصداف
بيقولوا : اٍن البحّار دا مالوش
ف حماية جزيرتنا الميمونه
ورعاية الورد
ركنوه ع الرّفّ
بس فضل بينه وبينها
رسايل
بتيجى فى شكل رذاذ
من بحر بعيد
رذاذ
النقطه اللى بيتوصل منه
بتبقىَ
اختصرت بحر بحاله
عمر بحاله
..........
محمد علي عزب
0 التعليقات:
إرسال تعليق