على كعب وحيد
والكعب الثاني
عمره ما لمس الأرض
على كعب وحيد بيلف بلاد الله
وكأنه
راقص تنوره
بيرقص رقصة بشروش
ف نهار شتوي..
على شط بحيره بعيده
كل السفن الغرقانه ف جوفها
طلعت من قلبه
وكانت عاوزه تعدي البر الثاني
كل الملح المتعبي ف جوفه
طالع منها
ملح منشف ريقه
ومعلي له الضغط
وبيكوي الجرح
بس بيحفظ جواه
من غزو العتة
أسماء وملامح أشياء
تشبه بالظبط
ميعاد الطرح لشجر التين الشوكي
ف صحرا بتحتل المسافات
بين حبل الصوت
وأغاني روح رجعت م الغربة
اشياء
بيلف عشانها الدنيا
على كعب وحيد
وصوابع رجليه التانيه يادوب
بتلط الأرض..
....
محمد علي عزب
0 التعليقات:
إرسال تعليق