على نفس البر
وتحت التوتة اللي اتهجرت
جهزت الراكية مع الكنكة
وسرحت شوية مع الفنجان
فلقيتني بلم حيطان البيت وارصفة الشارع والكلية
وحبة تفاصيل جوه الروح كانت منسية
أو اتهيألي بإني نسيت
مع أول شفطة من القهوة
تتنازع جوه دماغي حاجات اشكال والوان
بتكسر بيني وبين نفسي
أسوار وحدود
وأنا بين وشين بيخانقو ف بعض
الأول عاش من غير ماضي
والتاني اتعود ع النسيان
بالرغم ان انا ضيعت سنين
من عمري عشان
احلام وعهود
وأديني بعود
على نفس البر اللي ضحكلي
وأنا حادف وشي ف وش الشارع
بعد ماشاب
مش لاقي مكان
ولا لاقي الضحكة اللي بتسحرني
ولسه فاكرها ف وقت ماكنت...
برش الشارع والأسفلت بلون النور
واتوضى بطهر قلوب الناس
وبحايل حلمي اللي مقلع مع آخر شمس
وواخد كل سنين العمر اللي اتهدرت
وف لحظة طيش
وبحايله يصون لو حتى العيش
ولا قادر أكون غصبن عني
نفس الأيام اللي اتداست
واتفرمت بين عجلات الشيب
والعمر اللي مسافر مني
مستكتر حتى يسيب عنوان
حتى الأحلام اللي فاتتني
من وقت ماجاتني تطمني
والليل اتسحب فوق راسي
مع آخر شفطة من الفنجان
........
محمد الطنطاوي
0 التعليقات:
إرسال تعليق