قالتلي هاموت
وغاب الوعي من قلبي
بقيت مااوعاش
وغاب الضيّ من عينها
وسابت روحها علي كفي
حبيبتي بلاش
ووقته مجاش تفارقيني
امانة ياعمري ياسنيني
لـ تصحي تردي فيا الروح
ياروح داخلة في تكويني
جريت للوقت يسرقني
اروح لطبيب ويلحقني
واخدها ف حضني من ضعفي
وشلَّة دماغي 100 فكرة
واخاف لـلحضن يوحشني
ودا اخر حضن الذكري
وقلبي مش مصدقني
ولو هادِّيها من روحي
تروح الروح وتسبقني
بقيت واقف كما المشلول
ضباب من رعب ويا ذهول
لقيتي بكلم الحقنة وبتوسِّل
لكاس محلول
عليك بالله تصحيها
وكل آلامها تمحيها
واوصِّيها
بشكر المولي لشفائها
وخليها ما توجع قلبي بفراقها
دي صاحبي وبحر أسراري
دي شمس الدنيا في نهاري
وقفت كلامي ولأني
لقيت الننِّي في النني
ولمست ايد تطمني
تشيل سهم الفراق مني
وقولت بصوت يبكيني
ياعشق الروح وحشتيني
بدونك شئ ضعيف ماسواش
وجودك شئ مقوِّيني
ووجعك شئ مموتني
ونبضك شئ بيحييني
بحبك حب انتي وبس
بدون اذنك
بدون ما اتحسّ
ومش لازم تحبيني
وياريت حسَّاني وملاحظة
اكيد بعدك هاعيش ميِّت
بعين مكسورة مش جاحظة
ولو فعلا فراقنا اكيد
ف بالتحديد
يكون ندرن علي قلبي
بوقف النبض في اللحظة
....
محمود القصبي
0 التعليقات:
إرسال تعليق