ليه بتقتلي ..
فرحة عينيا باللقا ؟
يوم ما التقى قلبي معاكي بفرحته
ولا حستيش .. لحظه بناره ولوعته
من حسرته رَوّح حزين مكسور .
قرر يثور من يومها على كل القلوب
ولا يوم يِدوب ويدوق مرار المُغرمين
يا عاشقين .. دا العشق كدبه مؤكده
عمر الندى ما يبل ريق
مات الغريق والقشة كدابة
والعشق غابة ومتوى للمطاريد
هَتعيش وحيد تحلم بروح للروح
والكون سجون حواليك ومانعه الضي
ميّت وعامل حي !
خليك صريح دي الضلمة مفروضة
سَلّم بإنك طير بس بجناح مكسور
والنور أكيد خاصم عينيك مش جي
والحلم طوّل أوي واهو لسه ما اتحققش
هتشوف كتير كوابيس طنش وماتدققش ..
من إمتى حلمك كان بيبقى متاح
حتى البراح مهما وِسع بيضيق
ولا فيش طريق قدام عينيك مرصوف
فوق الرفوف .. مركونة دواوينك
الله يعينك هو وحده معين
هَتقول يا مين واللمة أصلاً وهم
الشعر مش ترياق وانت عديم الفهم
والحب معنى وجعنا بالتأكيد
كيوبيد ده عيل غبي
كسٌر بإيده السهم
لو فاكر انك شهم .. تبقى أكيد مغرور
ياما بانيت ف قصور والسندريلا سراب
والعمر عايشه خراب أرضك بتطرح بور
حتى النسور في سماك ..
ظاهرة كما الغربان
عيان وخدت الدوا ولكنه كان مسموم
عايش صحيح إنما واخد لقب مرحوم
غاوي تعد نجوم وانت بليد في العد ؟
ركز هنا في الأرض إياك تبص لفوق
لازم تفوق يا حزين من غفلة السكران
عمرك مالهش ضمان ضحكوا عليك يا عبيط
وأخدت إيه والنبي م الدنيا غير تنطيط !
دي الفرحة بالتقسيط هتموت ولا تسدد
باسبور جناب الأمل طب إمتى يتجدد !
حدد لروحك وقت تبكي عليك
تنعي اللي باقي جوا منك فيك
دا مافيش شريك للأسف ينفع لأحزانك
والكل خانك حتى القُريب ليك
........
محمود السيد
0 التعليقات:
إرسال تعليق