باعت راحتها وحتتين الصاغة للأيام
بكوزين دره وماجور عجين
تكوي الدموع ف القلب مش ف العين
مكتوب عليها الرحرحة ف الجرح
تنخل ف حب القمح والأحلام
عايزه سليمان " على اسم أبويا" يكون جدع
عايزاه حنين بسي ما يكونشي خرع
يجمد بدون ما يخش ف بلاد العبس
سندي وونس
مش قلبه جامد زي حتة صخر
أو شقفة رخام
على كف إيدي يعد ركعات الصلاة
يسند صباعي ف التشهد لو وقع
ف الفاتحة والضالين... ما يمسكليش جرس
مش يعني غلطة هتمسح اللي بيتكتب ف اللوح
ولا يعني ركعة قبل ركعة هتنقب الاسلام
خالصين ف حضرة ربنا..... خالصين يارب
جبت سليمان قبل اما رجل الموت يدوس اخر نفس
فوقف عشان يسقي الغيطان
ينفخ ف روح الشمس.... من سورة القصص
من باب أوضتها وسقعة الحواديت
وخروج ورق نتيجتها ع المعتاد
بتصب من قلتها تملا الكف
والبحر يملاه الحنين لو جف
يارب.... من نص ساعة وهي تحت الجزع
نزلوا الرماه من فوق جبل بيئن
أبيض شعر التجربة بالسن
كان اسمها المعدن ف جوفنا يرن
فكت حبال اليُتم من ايدنا
واتعززت ع الذل ما خطبهاش
شَدتنا من شِدتنا عَدتنا
جدلت غناها حنين وبن وشاش
كبرت ضوافر ايدها ع الخرابيش
واستعظمت أكل الدموع بالعيش
ما بين قوسين تقدر تقول دي أم
وبراحة تامة تقول.... عليها الجيش
دول مش فراخ
ولا هم ايد مكسورة ولا ضهر اتقطم
دول ٦ حجات طبطبوا على ضهر جرحي ف حضنهم
حطيت شموعهم قطرة لليل والعما
قادت عينيا اللي انطفت من نفخة الليل ف السما
٦ انتصارات ع الزمن
ونص فدان وقف قمحه بيستوي
علشان كده بتمووت ف رحمة ربنا
وعلشان كده بتحب عبناصر قوي
ما استسلمتش لمفتتح كات فيه هتبقي أم اليتامي
ألقت بكاها ليمها
ولعجزها شاورتله مع الفين سلامة
استرجلت كما أي جندي يخش أرض المعركة
ما يقولشي اااااه
حتى ولو جرحه اتفتح
يحبس بكاه
علشان تعدي المركبة
أشهد بأنك طيبة
بتعمري لنض البيوت
وتخافي على قطط الشوارع
من هجوم البرد وخلو السكك
أشهد بأنك تنفعي قصة على لسان شهرزاد
حدوته على منقد ما بيصفيش رماد
فضلت ف وش الدنيا دي لحالها
لله يا حاجة..... تنفضي هدومك
بطلة رواية عظيمة من يومك
وأول نبيه بدون ما يوحالها
ب ٥ عروق بتسقفي الأيام
٤ يشيلوا النعش وواحد ياخد العزا فيا
مستعفيه قدام سهام بتطيش
ضعيفة م الحنية وقوية
شجرة غنا ندهت على العصافير
تحلب معاهم شمس شتوية
تنفخ ف عين الأيام اذا انطرفت
وتمد توصل بين حاجات فيا
ب ٥ عروق صلبت بنا العمدان
واستنظرت تقطف ما شال الزرع
يارب.... من نص ساعة وهي تحت الجزع
مستنظرة يجي مخاض النور
وتشوف عرقها لما سار تفاح
ما يمسش القطط الصغار السوء
وساعتها تعرف تقرأ ف الألواح
علشان كده....
كل ما باجي أقرأ " وأذكر في الكتاب مريم"
ألقاني ببكي وأقول يارب..... " صباح"
........
سليمان الزهيري
0 التعليقات:
إرسال تعليق