عصفور...
من غير الريش
بيطير بغناه
بالحلم الساكن...
ف ضلوعه
ولا همُّه الريح
ولا حتى مداه
مش شايف غير النور
المتعلق على صدر سماه
وبيحدف...
على شيش شباكي
عناقيد الضيِّ
تضحكله...
ستايري وتتمايل
على لحن صداه
وانا لسه بعافر في الضلمه
وف حلمي النيِّ
وباداري خيالي من بكره
لياخدني معاه
وبخاف على قلبي ليتعلَّق
ببنات الحيِّ
دول قالوا
العشق زي الملح
ف جوف الآه
واتكرمش...
جوَّه حروف البرد
وقلبي ناداه
والعمر بيجري قدامي
وبيلعنِّي ف كل خطاه
خاصمت روحي
كل جروحي
وطارت بيَّا
ف ملكوت الله
.......
سليمان خطاب
0 التعليقات:
إرسال تعليق