ومهما ازعل وايه يعنى
ومهما انده هاتفرق ايه؟
محدش حى فى الوادى..
فلاه واسعه وكون فاضى
وانا مصلوب على عودى
والواح تلج جار منى
وراحة قلبى حارميننى
حدود الحزن مفتوحه
كفوف الفرحه مجروحه
بقية الكلمه مدبوحه
وغصب عنى باتألم
فمهما انده مفيش فايده
وجوه القلب نار قايده
ف انا وحدى ال.باتألم
وغصه ف حلقى تتكلم
على احزانى باتنطط
وجنب التلج انا شايط
جوانح قلبى مكسوره
وباين كله فى الصوره
فحرق الدم متواصل
وحز ف نفسى دا الحاصل
بعدت بنفسى عن نفسى
باحاول الم اوصالى
والملم فى شتات الروح
يميل الحمل اقوم اعدل
يميل تانى اقوم واعدل
ولا فكرت يوم اعدل..
عن الواجب
وفوق الطاقه متحمل و
مش عاجب!!!
ونازل نفخ فى القربه
لا يوم بطلت أو زادت
فاعيد النفخ من تانى
ومن تالت
ورابع مستحيل تكبر
أعود لدروسى من تانى
أذاكر ملحق الأيام
عشان جمعى بيطلع طرح
ومطرح ماابتديت ابدأ
لافيه احساس ولا مبدأ
وكله فى العسل نايم
وانا صاحى على جراحى
هاموت م القهر من كمدى
ومن جهلى كتبت كتير
انا باكتب وناس تمحى
فيقلب وشى للقمحى
لألوان طيف
يارب الطف
فمهما اشرح فى مدرستى
ولاتلميذ بيفهمنى
ولا بيشوف ولا يسمع
ندا قلبى
برود فى برود
وتلج الدنيا جه عندى
يزيد عندى
واقول هاتزيد...
ماهيش عايزه
وكان حلمى انول جايزه
أتارى القربه مخرومه
واتارى النفخ كان فيا
فرغم العلم انا جاهل
جاهدت كتير
ولا استاهل جحود من حد
خلاصة القول..
لافاد نفخى ولا شرحى
ولا المكتوب على وشى
ولا السايب ولا المحسوب
ويظهر هو دا المكتوب
باحس بكسر مقدافى
ويجى الضغط متعافى
اقول يارب ياشافى
ماعادش العود بيتحمل
كما الأول
هاتوالدكتور يشوف جرحى
واخاف ليقول ماليش فيها
دى شكة ابره تنهيها
تفرقعها.تفضيها
مريضكوا مالوش علاج عندى
خدوه ع البيت فى وسط اهله
تلاقوا ...... بينده له .
......
إبراهيم عاشورعاشور
0 التعليقات:
إرسال تعليق