ماكانش الفجر بيقدر يصحى
غير لما ترش بهيه
بواقى غسيل الليل
والليل يتكرمش
وبيصبح معدوم الحيل
يتدادى الفجر
لحد ما يقدر يبقى نهار
ويرش الضي المتورد
وكأنه بيغسل عتب الدار
وبهيه تقول
فتاح يا عليم
رزاق يا كريم
ياسند ومعين
ماتيلا ياواد
ماتنامش لحد الضهر
وتتكلفت فى لحاف الجوع
دا الجوع حراق
قوم يلا يا واد
قوم صلى وسبح للخلاق
افتح كفك
واكبش من رزق الرزاق
------------------
عمار الفار
0 التعليقات:
إرسال تعليق