سنين بتمر والدنيا
بتسحب مني ترخيصها
يشيب الشعر والكلمة
بتدي قرار بتنكيسها
وضهري اللي انحني مني
وضيقة لمين هورثها
نجرب حظنا برة
يا دنيا الله ، طلب هجرة
مساكن حابسه مين فيها
وفاكرينها تكون دارنا
بيوت ظالمة حواشيها
بنقتل فيها مقدرنا
وفاكرين الخنوع م الصبر
نقول معلش دا قدرنا
ومش فاهمين ولا هنفهم
بان الصبر مش ذله
يا نفس ما تكفري بيهم
وهاجري وسيبي دي الملة
شيوخ الجهل في بلادي
علينا أصبحوا شلة
بنفتي لبعضنا نسرق
ونفتي لبعضنا نقتل
ونفتي لبعضنا نحرق
وكله لكله بيهلل
يا دنيا الناس يا خنقاني
يا دنيا الله يا وحشاني
يا دنيا النفس ما تشوفي
نهاية لكل احزاني
مكان تاني بدون سجان
ولا قاضي ولا قضبان
ولا ثوره ولا بركان
طلب هجرة
اعيش انسان
........
هاني عبد الوهاب
0 التعليقات:
إرسال تعليق