عازمٌ لنولِ عُلا
لا أخافُ قيظَ فَلا
أَتْعَبَت خُطى قدمِي
كلَ من مضَى وتلا
رافعُ الدُّعا مدداً
أستزيدُ كلِّ صَلا
لُقمتي بمَعجَنتِي
أحرفي خلت خَلَلا
رايتي بدت شَمَماً
ظلُّها غدَا جبلا
عينُ جوهرٍ لمعت
ضاءت الدُّنا أملا
أينما أكونُ أنا
أقتلُ الأسَى مَلَلا
........
إبراهيم بديوي
"إلي روح الشاعر الكببر سيد حجاب"
برغم الألم...برغم الأسي
برغم الأنين...ورغم الحنين
لسه الأمل موجود ف بكره جديد
ونهار بيضحك للنجوم وسعيد
نهار يطلع من العتمه
وبيردد غُنا وأناشيد
علي روحك يا ابو التفانين
نهار أبيض بلون البدر
وماسك نجمتين وسبيل
وقلب اتوضا بالقرآن
ورتل أحرفك ترتيل
على جناح البيان راكب
دواه المرّ كان قناديل
وكان لما مشاكله تزيد
ويتعصب وخلقه يضيق
يسيب الصالة والتكييف
ويقعد وسط أصحابه وأحبابه
هناك ف الريف
على شط الكلام يفرش
ويفرد للحروف جناحين
ومن حواليه
حدود الكلمة والمعني
يقول أشعار
ويشكي همُّه للأمطار
وللأشجار
بدون ألقاب..بدون تكليف
وكان حبُّوب ودمه خفيف
ولما الدنيا تضحكله
يمد إيديه ويمسح دمعة المحروم
ويتصدق على الفقرا وع المساكين
ودمعه للغلابة يسيل
يا سيد يابن عم حجاب
ياعود الزعفران...والتين
سلام من روحي على روحك
ومن قلبي سلامي دليل
قصور الجنة ونعيمها
يا صاحب ما التقيت له مثيل
هتفضل بينا تسبيحه وترتيله
وومضة حلوه ..ومليحه
وشمس أصيل..بوادي النيل
هاصور غنوتك صورة
وأوزعها على الملايين
هتفضل بروحنا يا بلسم جروحنا
لطول السنين
قصايد محبة...تجمَّع أحبة
برغم القساوة ورغم الحنين
......
كفاية أسئلة...ودموع
كفاية وغيري..الموضوع
لا أنا خاين ولاغدار
ولا ساكن حشايا نار
أنا قلبي خلاص اختار
يسامح قلبك الموجوع
كفاية أسئلة ودموع
كفاية الهجر يا عمري
لاهو بأمرك ولا بأمري
دا حبك سكتي وقدري
بقولهالك..بصوت مسموع
كفاية أسئلة ودموع
لا بينا عتاب ولا أعذار
معاك ولآخر المشوار
ومهما يطول علينا الليل
هنورلك حياتي شموع
كفاية أسئلة ودموع
يا موج البحر يا غدار
كفاية تعبت م الإبحار
على شط الغرام ساكن
وقلبي م البعاد احتار
تعالي نغني للدنيا
ونمشي لآخر المشوار
تعالي نعلم العالم
حروف الأرض والأشجار
بحبك أيوة باعلنها
لموج البحر والأمطاااار
لا أنا خاين ولا غدااااار
ولا ساكن حشايا نااااااار
أنا قلبي خلاص اختاااار
يسامح قلبك الموجوووع
كفاية أسئلة ودموع
.....
خالد إبراهيم
يا مصر سهمك نفد
ف قلب اعادينا
زايد عليكى الحسد
م الصحراء للمينا
خطى خطاكى بهمة
يا فريدة من نوعك
مهما يعادوكى
ويزقوا لوقوعك
قِيمي ضهرك كمان
ووسعى ضلوعك
ده الحب مالي النيل
يا مجملة ربوعك
عزك على يدي
خدي ف خير و ادى
مهما يزيد ودى
ده كلامى مسموعك
يا طرحة ورد وحب
والجدعنه من ياما
يا رافعة راسك فوق
ومشمخة الهامة
ده الشمس لو تشرقي
والمخلصين جيشك
شجاعة وشهامة
محال ف يوم تغرقي
أبطاله عوامة
....
محمد البحيري
