رسمت اللوحه للدنيا
سعادة بكدب ألوانها
و دي ليها هنا ذكري
و دمعة ثابته في مكانها
وممنوعه من النسيان
بتستني هناك أحزان
وريد ميت ما لاقي الحضن
دي كانت جنة ف خيالي
و كان الصبر مفتاحها
ورب الكون رسمها لي
جميلة بدعوة من روحها
وليه الجرح كان حالي
و زايده الدنيا ف جروحها
ومهما اتجملت هيَّ
دي لون الدمع يا صبيه
عروسه وحظها متلوم
بترسم روحها منسية
عروسه اللوحه بسمتها
بأحلي م الجمال فستان
و بنت جميله سكتها
وجع داير بكل مكان
وكانت أحلي ما فيها
زهور الفرحه ف عينيها
لكن في طموحها قتلوها
ودمع الكون ما يكفيها
وتتبدل على الرسمه
مكان الشمع والأسرار
وشمس خيالها للبسمه
بقت مصلوبه ع الأسوار
وحتى نجومها وهمومها
بقت مدفونة ف الأحجار
يا قطر العمر يا معدِّي
كفايه تقش ف وردي
مافيش غير الوجع روحي
ولا شوفت العذاب قدِّى
بقولها يا نفسي من نفسي
ياريتني ما كنت فنانه
تعبت حقيقي من يأسي
و آه من قهرتي يانا
جواز البنت في الحضره
عريس بيعاين القمره
وهم الأهل آهي تمشي
وتتجوز تعيش بره
ياريتني فضلت بنوته
بلم حجاره سفروتة
ده انا خدامة مجانا
وعايشة حياتي مكبوتة
.....
سعاد عصام
0 التعليقات:
إرسال تعليق