بلدي اللي ماشية تزق ف ساعات النهار
وتشد طرحة رأسها تحت من الشِيل
بلد الشموس الحافية على نهر الطريق
والضحكة زي الميه لما تبل ريق
سيدي ابومسلم يا مردوم بالبيوت
ريحة الغنا المسموع على فروع الشجر
حصالة الصبر اللي بيلم الشقوق
وبيسقي زرع الكفرانين م الخوف
وم البوح
والعطش
اول محطات اللجوء من بعد طوخ
نكش الفراخ ع الأرض لما يسير ندا
ضم التُرب لبيوت ولادها الشقيانين
عمم اللي قالوا... فأنظري ما تأمرين
إن الملوك..... يترحل الشوق للحنين
ويعدي الأسفلت اللي بيحش الضلوع
من مشتهر.....
أول مفارق حلمها المقسوم سكك
ولحد ما تعدي الوشوش الحبله بمجيء الفرج
عض الناموس ف اللوح
وتكسير الدرج
رُبط الشبت ع الكوبري في ليالي الشتا
رد اليمين للصبح لو طال الضلام
عشش اليتامى
دكاترة الجامعة
وعمدان ربنا
عيشها الملدن لما بيبوش م الشجن
ستي اللي تحت دماغها بتنام ع الكفن
فأس أرضها اللي بتحلب الأرض برضا
وتقول على أم كلثوم انها
بكرية النور للعما
جيش م العصافير اللي بيشد الوتر
ويسيب على كتاف الغلابة بقعة علشان يتكسوا
فيها الشوارع زي دخان مش عدل
تجاعيد على وش اللي تايهين ف الطريق
فبيسألوا......
الساعة في ايدين الليالي مأخره ؟
واللا دا عيب ف الخطوة لما تكون ورا ؟
مين اللي مات ف الفجر
مين اللي عاش ومجاش؟
بيقولوا حادثة وحد ف الانعاش
بيقولوا جاي ف مولد الكحال شرف
بجنيه بكا
بيخلي حجر الجوزة متحاط بالترف
ويشد صف المغرمين
زي القماحي الراقدة من تقل السنين
من مشتهر.....
اخر ضفاير بنت لما تلمهم
والدنيا لما بتجري تشبه بليهم
فيعدوا ورا خط القنال مع فيلم حرب وننتصر
ونخاف نموت فنروح لشيخ صوته عفي
" اذا جاءك الملكان فأقعداك"
أكيد ماهياش هكذا عتمة بكاك
بس انت عديت الحواجز كلها
وفتحت ع الرابع كمان
من مشتهر.....
سليمان الزهيري
