ولقمة شوق
نغمس بيها أوجاعنا
ماتشبعناش
ولا لقانا غزل مواعيد
ولا زارنا قريب وبعيد
يفرح قلبنا بيهم
وبيتنا اللي صبح أركان من الذكرى
بتحدف دمعنا ليهم
وكانوا أهلنا وناسنا
فاتونا وهجرهم داسنا
وحتى الكلمة لو نزعوها من جوه الصدور الحلك
مابتشبِعش إحساسنا
لاعشرة بترهن الأحلام
على ضهر العشم فيهم
ولا ف بعادهم ارتاحنا
دفنا الحزن ف قلوبنا
وكان توبنا
الرضا والصبر ع المقسوم
وجه اليوم اللي نتلهف
لضحكة تطل ف قلوبنا
وكلمة تدادي أرواحنا
ونشحت أي لحظة شوق
بتنزف من قلوب الناس
ونتدارى ف جحود وبعاد
ده مهما اتعاد علينا العمر من تاني
زمانا هينسى لقيانا ومايجمعناش
وبيتنا من إزاز مكسور
لا عمره سترنا ولا ساعنا
ولا الضحكة اللي راسمينها
بتقدر تمحي أوجاعنا
ومهما تحن أرواحنا
لايوم هنداري ف جروحنا
ولا بننساش
.......
محمد الطنطاوي
٢٧/٦/٢٠٢١
0 التعليقات:
إرسال تعليق