لكن الكلمه بتسافر ف اعضائي
تدور فيها عن معنى يجمعنا
.وتنسانا عشان نبقي
بعيد خالص
منيش رحال
لان الرحله عاوزه المال
ولاني وكما يبدو كده مني
وعارفيني
وكتير مني
فقير خالص
منيش رحال
عشان احزاني وخداني ورمياني
في مطرح نفسي افوت منه
واعدي فيه مع حمولي
ولكن مين هيمهلني
وانا حملي
تقيل خالص
منيش رحال
عشان وطني كبير جدا
ومتوزع يمين وشمال
ومتقطع حدود وجبال
وانا خايف اجول جواه
واحس بغربه تقتلني وترميني
بعيد خالص
منيش رحال
مع اني سافرت سنين
وجوايا الطرق تاهت
وشاخت في ليالي العتمه والحراس
وغبت سنين عن داري
ومشواري باخر خيط من شمسي
يشد ف ضلمتي نهاري
ربطته ربطة الملاح
واسراري وافكاري مداريها
بخاف اطلع عليها الناس
لتسرقني
توديني ف سكه ناس مترحمشي
عشان معايا كلمه حيرانه
فاسبت الناس
وبا ابحث عن طريق
بعيد خالص
منيش رحال
مع اني مبتعبشي ولا بهمد من المشاوير
ومهما تقلت الاحمال مابرجعشي
ولا ببكي
مع انه عيوني الصافيه متواعده مع الاحزان
وماتعبتش مع ان السياط تعبت
ف ايد جلاده مسكاها
في ايد دجاله شيلاها
تخبي الشمس فتعتم حوارينا
وتطوي الليل سحابه سوده ف عينينا
وتسرق كل نسمه نور تحاول تتحد فينا
وتخطف كل كلمه حق
تحاول تتولد فينا
وتخنقنا فتلحقنا ايدين منا
وتطعمنا من الزاد
القليل خالص
منيش رحال
لكن عيوني مشتاقه
تقابل خطوه مفهومه
علي البعد اللي مش عارف
بان همومنا جوانا
وقلقانا وتعبانا
وباقيه زي القهر ويانا
وطولها طول الليل
غبي و نجومه مخفيه
وام حزينه بس همومها مخفيه
و محنيه
علي لمبه ضعيف نورها
فابيزورها
كلامه غريب ماتعرفهوش متفهمهوش
لكن راسها مهزوزه
وعامله انها فاهمه
عشان علي ابنها خايفه
تخاف الرعب يحنيها
فتصرخ كلمه جوه القلب معناها
وتتالم علي حالها علي حالهم
وتتعجب علي الدنيا
لانه طالب من الموج اللي ف شطوطنا مايرجعشي
وعاوز من طيور الحب غنيوه متتقالش
فاحلم وانسجن تاني
بحريه ف احزاني
واقطف كلمتي الخايف علي لساني
واشوف حارس يناديني
يساومني علي ديني
ويديني ازازه وهدمتين دايبين
وف الاخر قلم خاين
ويطلبني اكون الناس
واكتب كل ماقالو
وارسم شكل خطوتهم
وسكتهم وضحكتهم
فاصرخ من الالم تاني
اخون الناس
وانا اللي البسمه ف عينيهم
تنسيني هموم ازمان
وانا اللي الضحكه ودموعهم واحلامهم
مرايتي وكلمتي وصوتي
واصرخ اخون الناس
فتخرج كلمتي الخايفه
نسر يطيح بدبابيره
واقول
عمري ما اخون خالص
انا اللي الكلمه سابقاني علي الترحال
وتندهني كما النداهه ف الغيطان
الاقيها علي ترس الحياه بتدور
وسابقاني صواني فطور
وتتحور تكون طلقه
وايد سابقه الحياه بالنور
تطلع فجر لسه اوانه ماجاشي
لان الحاكم الظالم
قطع الارحام ماخلاشي
وسف الدم مشبعشي
فانا لازم اكون طلقه
يا اموت خالص
************
محمد مصطفي الهلالي
0 التعليقات:
إرسال تعليق