عارفين ليه ؟
فيه نوع من عدم الود مابينى وبين
جزء كبير من تماثيل الميادين
باتكلم عنه كنير ف قصايدى
علشان
التماثيل دى
اخدت مطرح
أشجار التوت والفاكهة
اللى زرعها
راجل
كان ببشيلنا على كتافه
ويعدينا الشارع
حارب بدل الحرب اتنين
وتلاته
حارب وعبر
وطلع م المولد بعد ده كله
مركب طقم سنان
او رجل بلاستيك
أو صابه عيار
واستشهد
واتحط ف حتة حفره عليها
يفطه رخام
مكتوب فيها
انت الآن قدام
قبر محارب مجهول
مش بس كده
دى التماثيل دى
اقصد جزء كبير من تماثيل الميادين
كان ولغاية دلوقتى
ضله بيدهس
وبيكتم على انفاس احلامى
وأحلام عيل
كان قاعد جنبى ف نفس الدكه
كان دابما بيكلم عصافير
بتزقزق
على شجره قصاد شباك الفصل
ويقول لى:
اتعلم منها الطيران
كان دايما يوصف لى
شكل هلال العيد
ويعلمنى
ازاى استطلع وقت ظهوره
وانا برضه كمان علمته
ازاى
يكتب اشعار ورسايل غراميه
وانه مايقطفش الورد
أو ينتف ريش عصفور
قسمنا الاحلام والعيش والملح
حتى الضرب كمان
بعصاية استاذ الجبر
لو طال واحد فينا
كنا بنقسمه على بعض
....................
محمد علي عزب
0 التعليقات:
إرسال تعليق