غويط بحرك يا دنيا كبير
و عمره ما قوِّمك قومه
وأنا المظلوم ولما باقوم
ألاقي الدنيا واخداني
بتجرفني في بحر هموم
و أنا باغرق...
ماليش ف العوم
و كاسرة الدنيا مجدافي
أشبّ... أغطس
أعوم... أفطس
مهامَّاش
ولو حتى أروح ببلاش
ماليش... مرسى
و كل ماحاول إني أرسى
بييجي الموج و يجرفني
يغطسني... وماعملتش...
حساب لليوم ده م الأول
ده ليل الجرح بيطوِّل
و طول الليل بئن الآه
و الترحال بيطوِّل
و موج البحر يا قلبي
شديد... عالي
بياخد كل شئ غالي
ويرجع تاني يحدفنا
بقى لغيرنا... يكفِّنَّا
خلاص خِلصت...
بقى روحنا
مانلزمهوش
يا موج البحر يا مغوار
و فيك ياما كتير أسرار
مخبيها ف أعماقك
ب اتوه ف جمالك الخلاب
وقلبي ياما دق أبواب
ومش عارف لها مخرج
أعوم ...... أغرق
مهامَّهاشي
....
يامنه اليمني
0 التعليقات:
إرسال تعليق