الموت
أقدم مخلوق على وجه الأرض
وأظُنّ ان الموت والأرض اخوات
وزمان
كان دايما يظهر ويبان
للخلق اللى اتوجدِت قبل الاٍنسان
مخلوق ضخم وجبار
وعينيه فوهتين بركان
بيعرق مَيّة نار
رجله الأولى فْ شرق الدنيا
والثانيه فْ غرب
ويمدّ صوابعه بخفة ساحر
يقطع كل خيوط الوصل
بين الروح والجسم
أوّل ما نزل آدم م الجنه
اخترع الموت
حاجه زىّ طاقية اٍخْفا
وطَوَّر سِحره
وكانت أول تجربه للسحر المُتَطَوِّر
قَتْل "قابيل" ل"هابيل"
من يومها وآدم قلبه بينزف
واحنا ورثنا الجرح
لكن بنحاول ننساه
ونغطيه
علشان شكلنا يفضل حلو
قدام خلق الله فى الأرض
من حشرات
وطيور ونبات وحجر وخِلافُه
اٍحنا ولاد القاتل
دايما بنحاول ننسى الجرح
ونسمّى أولادنا "قابيل"
أرواحنا
أشجار وطيور شفافه
بتربِّيها الأرض
لحد ما ييجي الموت
يفصل بينها وبين أجسامنا
اللى بترجع للأرض وتبقى تراب
يتشكّل منها
تماثيل ميادين وشوارع
وغيطان
وبيوت
والروح تطلع لخالقها
وترفرف ف السموات
والموت يفضل
أقدم مخلوق على وجه الأرض
كلنا كارهينه
بس برغم دا كله
الموت عنده رومانسيه
أيوا رومانسي شويه
بدليل اٍنه
بيحب يشوف الزرع الأخضر
والورد
محطوط فوق قبر الميت
.....
محمد علي عزب
0 التعليقات:
إرسال تعليق