إبتلاء ... بقلم المبدعة / إيناس سيد جعيتم

أنا مبتلاه

بس ابتلائي ...

ما كنش عمره اني هويت،

كلمة بحبك قلتها

صرخت ضلوعي بتتكوي

من نار في قلبي إدتها

و لا يوم شكيت

.
ولا ابتلائي قسوتك

انا قلبي شقق مالوجع

فداريت شقوقه بذكريات

وكمان رضيت

أنا ابتلائي في احتياجي

اه بعترف،..... محتاجة ليك

من طول بعادك ...

اتمحت كل النقط من عالحروف

فازاي أبوح؟؟

وازاي ادوق طعم الحياة من غير لقاك؟ 

ازاي الاقيى فبعدي عنك روحي روح؟

انا روحي شبعت مالجروح

ازاي اقولك محتاجاك 

فيكون جوابك بالسكوت

قلبك دا ايه، قلبك حجر

لو كان حجر وسمعها مني ....

كان طرح من بين شقوقه سنبلة

تطرح بحب مزققة عشق وحنين

وانا من سكاتك برتوي حزن وانين

بالرغم من كل الوجع

من كام مكان ف القلب

بايتين مجروحين،

مش قادرة اقولك اي شيء

غير كلمتين

محتاجة....ليك.

......

ايناس سيد جعيتم

إقرأ المزيد

وطن ..بقلم الشاعر.. محمد الطنطاوي

  

كل اللي حلمو بجنتك
غفلت عيونهم عتمتك
ولا كان بيصلب هيئتك حضن البيوت
حتي اما كنت بتغزل العشق 
ف عيونك للحياة
كانو يشوفوك طوق النجاه
يتداروا فيك
تعرق جبينك 
صورة ابوك
ريحة الشوارع و العرق 
معجون ف لحم الطين
بينسج من خضار روحك قلوب
مكتوب علي جبينهم رسول 
هيفك اسر الاوليا
وانت اللي ما قدرتش تكون
قدرت عيونك تفضحك
رغم امتثالك للسكون
او حزن فارش مطرحك
يتعكزوا علي ضي روحك 
تتفرد كل التجاعيد 
اللي كسرت ضحكتك 
بتعد انفاس اليتامي 
المدبوحين جواك
وبتعاهد تراب الطيبين
 انك تكون محصول خطاهم 
 وانت متحاوط مابين كل الوشوش
العشمانين لحظة رضاك           
واشم علي عيونك شقاك
حبة رتوش مالهاش تمن
توهب دموعك للي باعك
واللي فاكرينك....وطن

محمد الطنطاوي

إقرأ المزيد

سؤال برئ ...بقلم القاصة / إيناس سيد

        تصاعدت الأبخرة والروائح من الأواني المتراصة بصعوبة فوق الموقد الصغير، أشاعت جو من الدفء والسعادة بين الأطفال بينما جلست الأم تنظر إليهم وقد زادت إبتسامتها الغرفة إشراقًا وهي تتابع أطفالها يلعبون،لايعكر يومها سوى صوت القطرات المتساقطة من ماسورة صرف حوض المطبخ، ذلك الصوت الذي يذكرها دائما بعجزها عن إصلاح أي شيء وكل شيء، يسأل الأطفال عن الطعام فتجيبهم: الصبر، وتتابع تقطيع حبات الخضار بسكين ذات يدٍ مكسورة، تقف أمام الموقد وتسارع في توزيع الطعام في الأطباق مع هتافات الأطفال، تضع الأطباق على الأرض ويلتف حولها الأطفال ينظر الجميع لقطع البطاطس والباذنجان وقليل من بواقي طعام اليوم السابق وينظرون لوالدتهم التي تبادرهم بإبتسامتها وتقول : نسيت السلطة، وتحضر الطبق وتضعه وسط الأطباق وتداعب الأطفال بعبارات تحثهم على الأكل، يبدأ الاطفال في الأكل وتقطع الأم لقمة من الخبز وقبل أن تمدها للطعام تمسك برغيف وتبدأ في تجميع القليل من القليل في كل طبق تلمح السؤال في أعين الأطفال فتجيبهم قبل أن يسألوا بأنه طعام والدهم، تأكل لقيمات بسيطة وتمضغ الطعام ببطء وتشبع مع تناول أطفالها الطعام، تحمد الله على حياتها البسيطة وعندما سألتها ابنتها عن أمنيتها في الحياة لم تجد ما تقوله سوى : أتمنى أن نصلح ماسورة صرف المطبخ .
..............
إيناس سيد

إقرأ المزيد

وصية ...بقلم الشاعرة / ولاء عدنان

 

إلى إبني إللي بستناه
 
وبترجاه من الدنيا
 
إلى إبني اللي كان حِلمي وحِلم أُمه
 
أنا الحضن اللي مِستني يحسك كُل ماتضُمه
 
إلى إبني إللي معرفشِ هايبقى شكل مين فينا
 
أنا كان نفسي أكون مينا
 
وأكون وقت الطوفان مرسا
 
وأكون فُرصه ماتتعوضش
 
ياريت ماتجيش ،
 
عشان ماتمُوتش في الإستاد في هوجة ماتش
 
عشان بُكره ماهوش أحسن
 
بلاش أحزن على تعليم مابيعلمش
 
ومايسلمش ويأمن ولا بشهادات ولا كفاءات
 
ياريت ماتجيش
 
عشان بلدك مابتكرمش غير أموات
 
أخاف مثلاً ،
 
ميراثي ليك يكون حبة آلم أو ضعف
 
وماضمنش تكون عكسي
 
وبعد سنين دراسه ف هندسه أو طِب
 
عشان القوت تسوق تاكسي
 
تبيع حُمص على الكورنيش
 
تُخش الجيش تحارب ع الحدود وحدك
 
تموت وحدك
 
وتتلون بلون الشمس عِز الصيف
 
فياخدوا عزاك في مكاتبهم
 
شوية ولوله وصوات
 
شوية شحتفه ودموع يطيرو من هوا التكييف
 
على حكومات هوايه عندها التعسيف
 
ولا تقدر تقول البِم
 
على لقمه بطعم السِم ولا تسمِن ولا تشبع
 
عشان الظُلم في بلدنا مِتبت فيها ومربع
 
على شُغله ماحبيتهاش
 
ومجبر تشتغل فيها
 
فتبقى مُرتشي وشاري عذاب الدنيا ومبضع
 
على البنت اللي حبيتها
 
ونايمه فيك بتتمطع
 
بتتقطع عشان صبحت نصيب غيرك
 
على سيرك في سكه كلها ميله
 
ياريت ماتجيش عشان هاتشيل
 
ومانتش قد دي الشيله

........

ولاء عدنان

إقرأ المزيد

قصيدة - صدفة ... للشاعر/ أيمن إسماعيل

صدفة

والنظره التايهه

جوا عيونك

بتحاول تهرب منى

وعيون تسكن جوا الننى

بتفك طلاسم قلبك

وبتعزف

على وتر البوح

الروح بتبوح

تنقش جداريه

ف قلبى لصورتك

يتعلق قلبى

بحبال قلبك

وانا وانتٍ

هو هو العشق

اللى مكتفنا

بيلف لفنا

ويطوحنا على

 طول درعاته

يباعد بينا

نتوه فى البعد

ويفضل كل مابينا

حبة شوق

  
على حبة عشق

ونظره تايهه

لو نتقابل صدفه

------

 أيمن إسماعيل

إقرأ المزيد