ومدت ايدها فوق كتفي تواسيني
وتمسح دمعتين واقفين
علي رموشي في وسط الناس
ودارت في مناديلها
اهات صوتي
ومدت بالحنان لمسه
تقولي بقوه وب احساس
(سلامتك ياعيون قلبي
سلامه قلبك الحالم
سلامه زهدك الحساس)
وعينها من حنان صافي
وقالت لي داريني عن عيون الناس
لقيت روحي بسحر الشوق
بتابع
وشفت الروح
رغم الرجفه
بتحاول تمد الشوف
وشفت نجوم ف عز الضهر
بتغازل ف نني العين وتندهني وبتجاوب
لمحت الدنيا
في الزحمه بتندهني
وبارفانها
بيملا الجو بالاحلام
انا بحلم اكيد طبعا
لان الناس محاوطاني
وزحمه في ميدان فاضي
وتوهه خلق بتنادي
لكن ازاي اتوه مني؟
في وش مالوش
في دنيا الحلم اي مثيل
ولا عيونها اللي خطفتي
وورتني لفين الضي
وخلتني احب الليل
واعد غيومه و نجومه
من عشقي لنورها الجي
و النيل اللي عمدني
والنخل الي حاوط
قلبها حراس
وضل كافور حدا الترعه
وفيه اسمك علي غلافه
جميل اسمك
مزين قلب مرسوم ع الشجر بالماس
حروفك غنوه ومنحوته
بدون الوان
وتعويذه بخيطان توبك
وشعر مايكتبوش غيري
بيتباهي برمل ابيض في صحاريها
عجايب من غرايب الكون
والوان من دهب ورخام
بتروي اللون علي جبالها
وتتباهي بارض بتنتج الاحلام
وبعشق سمر اراضيها
واحميها وافديها
واعوذ بالقاهر الجبار
حدود بيتها من الوسواس
واسميها باسم حبيبتي واعشقها
وكل صباح اناديها
واعديها في عز الزحمه بالانفاس
انا عارف بحبك ليه
لاني كل مااسافر
تراعي ف المدي طيري
وكل مايتخنق بوحي
تمدي الايد لأحلامي
وترويها العبير والنور
وسنك بالهوا باسم
وقلبك للعهود حافظ
فلا هونتي ولاخونتي
ولا تاهت ف قلب البعد ايامك
ولاسجلتي احزاني علي الكراس
وقلتي للحزاني غياب
بترويني عسل صافي
ومهما تجافي بتوافي
وبنسي القسوه من كفك
واسرح ف اللي جاي منك مع الايام
عرفتي ليه بحبك موت
ومهما اتعذبت عيني بعود هيمان
لانك مهما سبتيني وهجرتيني
مع صوتك ب بات فرحان
.............
محمد الهلالي
0 التعليقات:
إرسال تعليق